Այսպէս է ասում Տէրը. «Թերահաւատնե՛ր, ինչո՞ւ էք ձեր մտքում խորհում, թէ հաց չունէք: Դեռեւս չէ՞ք իմանում եւ չէ՞ք յիշում հինգ նկանակը, որ կերակրեց հինգ հազարին» (Մատթեոս 16:8)

Տեր Գրիգոր քհն. Գրիգորյանի շնորհավորական խոսքը Ծաղկազարդի առթիվ

Հայ Առաքելական Սուրբ Եկեղեցու սիրասո՛ւն զավակներ,

Մայր եկեղեցին այսօր մեծ հանդիսությամբ տոնում է Ծաղկազարդը՝ Տեր Հիսուս Քրիստոսի փառավոր մուտքը Երուսաղեմ տոնը, որի առթիվ ջերմորեն շնորհավորում եմ բոլորիդ: Տոնի ուրախությունը կրկնապատկվում է, իսկ պայծառությունն՝ ավելի ջինջ դառնում այսօր եկեղեցիներում ներկա մանուկների բազմությամբ, որոնց համար այս տոնը օրհնության օր է հայտարարվել Վեհափառ Հոր բարձր կարգադրությամբ:

«Պատվի՛ր քո հորն ու քո մորը, որպեսզի բարիք գտնես և երկարեն օրերդ…»,- ասվում է Տիրոջ պատվիրանում (Ելք 20:12), «Որդինե՛ր, հնազա՛նդ եղեք ձեր ծնողներին ի Տեր, որովհետև դա է ճիշտը»,- հավելում է Պողոս Առաքյալը (Եփես. 6:1), և անչափ կարևոր այս խոսքերը վերաբերում են ծնող ունեցող բոլոր զավակներին՝ անկախ նրանց տարիքից: Ծնողներն ամենակարևոր մարդիկ են, որ Աստված պարգևել է ձեզ, սիրելի՛ զավակներ: Ի դեմս ծնողների՝ դուք ստացել եք ձեզ անչափ սիրող ու շարունակ ներող սրտեր, գիշեր ու զօր ձեզ սնող, պահպանող ու ձեր մասին հոգացող դայակներ, ուսուցիչներ ու պաշտպաններ: Ծնողներն են, որ անասելի ուրախանում են ձեր ամենափոքր իսկ ուրախությամբ և ծնողական սիրող սրտից է ամեն անգամ մի կտոր անդարձ փշրվում ձեր ցավի պարագայում: Ուստի արժևորե՛ք ծնողի հետ անցկացրած յուրաքանչյուր ժամը, հետևե՛ք նրա իմաստուն խորհուրդներին, հեզ ու համբերատա՛ր եղեք, մեծագույն հարգանքով և որդիական խոնարհությամբ համեմեք ձեր սերը նրանց հանդեպ և այնժամ ոչ միայն Աստծու պատվիրանը կատարած, այլև «բարի հույս» (Առակ. 19:18) և «հոգու զարդ» (Առակ. 29:17) կլինեք ձեզ աշխարհ բերողների համար:

Սիրելի՛ ծնողներ,

Աստվածային ճշմարտությունն ասում է. «…չկա բարի ծառ, որ չար պտուղ տա. և դարձյալ՝ չկա չար ծառ, որ բարի պտուղ տա. որովհետև յուրաքանչյուր ծառ իր պտղից է ճանաչվում» (Ղուկ. 6:43-45), ուստի ձեր բարոյական և հոգևոր հասունությունից, ձեր մարդ տեսակից և Բարձրյալի հանդեպ ցուցաբերած անկեղծ սիրուց ու վստահությունից է կախված, թե ինչպիսի պտուղներ կնվիրեք Տիրոջը: Ձեր առօրյայից, կատարած ընտրություններից, ասված խոսքից, արված գործից է, որ սովորում են ձեր զավակները, և համապատասխան վարք ձևավորում ապագայի համար: Սեփական օրինակո՛վ սովորեցրեք նրանց Քրիստոսի խոսքը լսող ու կատարող լինել, և դա կլինի լավագույն ժառանգությունը, որ կթողնեք ձեր զավակներին: Սկսեք նրանց ծննդյան իսկ պահից և Աստծու պարգևած յուրաքանչյուր օր բարի սերմե՛ր սերմանեք նրանց դեռևս անապական հոգիներում: Սովորեցրեք կյանքը կառուցել ոչ թե ավազի, այլ ժայռի վրա: Սիրող Հոր պատվիրանները սովորեցրեք նրանց՝ որպես ողջ կյանքի միակ ճշմարիտ ուղեցույց: Եվ թող ծնողական սրտից բխած յուրաքանչյուր աղոթք, յուրաքանչյուր միտք, յուրաքանչյուր խոսք ու գործ ուղղված լինի ձեր սիրելի զավակների հոգիների փրկությանը, քանզի բոլորս էլ մի օր վերադառնալու ենք Երկնային Հոր մոտ և պատասխան տալու մեզ վստահված գանձերի համար: Ուստի երանի ապաշխարության ճերմակ զգեստներով և անխախտ հավատի ծաղկած ճյուղերով ներկայանանք Հաղթանակած Արքային՝ արժանի լինելով հավիտյանս օրհնություն ու փառաբանություն երգելու Փառքերի Տիրոջը: Ամեն:

Տեր Գրիգոր քհն. Գրիգորյան

Զորավոր Սուրբ Աստվածածին եկեղեցու հոգևոր հովիվ

Աղբյուր՝ Surbzoravor.am