Այսպէս է ասում Տէրը. «Ով որ մարդկանց առաջ խոստովանի ինձ, մարդու Որդին էլ նրան կխոստովանի Աստծոյ հրեշտակների առաջ: Իսկ ով որ մարդկանց առաջ ինձ ուրանայ, Աստծոյ հրեշտակների առաջ պիտի ուրացուի» (Ղուկասի 12:8)

Քրիստոս հարյավ ի մեռելոց. Օրհնյալ է Հարությունը Քրիստոսի

Օրհնյալ լինի սրբացված Հարությունդ, Հա´յր մեր: Ցնծությամբ ու սիրով իրար ենք փոխանցում Սուրբ ավետիսը` երջանկանալով հրաշափառ Հարությամբ քո: Մեր ամեն ակնթարթը քեզանով է: Դու, որ մեզ համար խոնարհվեցիր` մարդացար, ապրեցիր մեզ հետ ու խաչվեցիր` մեր մեղքերի քավության համար: Տե´ր, արժանացրու գոհությամբ փառավորել քեզ և սուրբ անունդ, լինել քո արժանի զավակները: Սովորեցրու քո նոր և կենդանի ճանապարհները, որ բացեցիր մեզ համար:

«Մեզ և ձեզ Մեծ ավետիս» բարձրաձայնում ենք շատերս` խորապես ըմբռնելով այդ ավետիսի կարևորությունը մեր կյանքում: Դու´, որ քանդված տաճարը կառուցեցիր երեք օրում և հրեշտակների միջոցով ավետեցիր քո կատարյալ հարությունը, քավիր մեր մեղքերը քո մեծ սիրո շնորհով և օգնիր առողջ ու անսասան հավատով գալ դեպ քեզ:

«Ամեն», պատասխանում են մյուսները և հայցում քո գութն ու ներողամտությունը կյանքի բոլոր օրերում: Քո հանճարով մեզ սովորեցրու ճիշտ ապրելու գաղտնիքները, որ ավանդել ես Սուրբ գրքի միջոցով: Մեր աչքերին, ականջներին ու բանականությանը հասանելի և սրտին` ընդունելի դարձրու քո պատգամները, Տե´ր, որպեսզի երկյուղ չունենանք` քո կամոք է այս կամ այն բանը, թե` ոչ:

«Ալելուիա», ասում ենք ի փառաբանություն քո անվան և գոհաբանություն ու շնորհակալություն մեզ այդքան սիրելու համար: Շնորհիր մեզ արժանի զավակներդ դառնալ, ինչպես դու մեր պաշտելի Հայրն ես: Ինչպես նաև քո մյուս շնորհներով օժտիր մեզ, որ այս խրթին ժամանակներում չտրտմեցնենք մեր սրտերը` հիշելով, որ Տերը մեզ հետ է ու մենք վախ չունենք, միևնույն ժամանակ հիշելով, որ խրթին ժամանակներից վեր կա Դժոխք, ուր լաց է ու ատամների կրճտոց: Դու մեզ արժանի դարձրու երկնքի արքայությանը, Հա´յր:

«Փառք քեզ, Տե´ր», մրմնջում ենք բոլորս ի խորոց սրտի, որ մրմունջ չէ միայն, այլ հոգու աղաղակ, քեզ պաշտելու հավաստիք: Դու Քո սիրո շնորհներով օժտիր մեզ, Հա´յր, որպեսզի հավիտյանս հավիտենից երկրպագենք Քեզ ու պաշտենք Սուրբ անունդ. Ամեն:

Հռիփսիմե Գալստյան

Աղբյուր՝ Holytrinity.am