Այսպէս է ասում Տէրը. «Ոչ ոք ճրագ վառելով ծածուկ տեղ չի դնի, այլ կը դնի աշտանակի վրայ, որպէսզի մտնողը լոյս տեսնի։ Մարմնի ճրագը աչքն է. երբ աչքը առողջ է, ամբողջ մարմինը լուսաւոր կը լինի, իսկ երբ աչքը պղտոր է, մարմինն էլ խաւար կը լինի» (Ղուկաս 11:31-32)

Սբ. Օգոստինոս. «Ոչ ոք ավելի մեծ սեր չունի, քան սա. տալ սեփական կյանքը ընկերների համար (Հվհ 15, 13)»

[...] Ձեր հավատքը ճանաչում է, թե Ո՛վ է հողի մեջ ընկած ցորենի Հատիկը, որ մեռնում է՝ բազում արդյունք պտղաբերելուց առաջ. Նա բնակվում է ձեր հոգիներում. չկա մի քրիստոնյա, որ կասկածի, որ Քրիստոսը խոսել է Իր իսկ մասին։ [...] Լսեցե՛ք ինձ, ո՜վ ցորենի սրբազան հատիկներ, որ այստեղ եք, որևէ կասկած չունեմ ես, [...] կամ ավելի ճիշտը՝ իմ միջոցով լսեցե՛ք ցորենի Առաջին Հատիկին, որ ասում է ձեզ. Մի՛ սիրեք ձեր կյանքն այս աշխարհում. մի՛ սիրեք այն, եթե ճշմարտապես սիրում եք այն, որովհետև այն չսիրելով է, որ կփրկեք այն։ [...] « Ով իր կյանքը սիրում է այստեղ՝ ներքևում, կկորցնի այն » (Հվհ 12, 25)։

Հողի մեջ ընկած Հատիկն է, որ ասում է այս խոսքերը. Նա, որ մահացավ բազում արդյունք պտղաբերելու համար։ Լսեցե՛ք Նրան, որովհետև այն, ինչ ասաց, կատարեց։ Ճանապարհը մեզ սովորեցնում և մատնանշում է Իր սեփական օրինակով։ Քրիստոսն, արդարև, չխնայեց Իր կյանքն այս աշխարհում, եկավ այն կորցնելու համար, Իր կյանքը մեզ տալու համար, և այն ետ վերցնելու համար այն ժամանակ, երբ կցանկանար. [...] « Ոչ ոք չի խլում ինձնից իմ կյանքը, այլ՝ ես ինքս եմ ինքնակամ նվիրում այն, որովհետև իշխանությունն ունեն ընծայելու այն և իշխանությունն ունեմ կրկին ետ վերցնելու այն » (Հվհ 10, 18)։

Ուրեմն ինչպե՞ս է հնարավոր, որ այդպիսի աստվածային կարողություն ունեցողն ասեր. « Այժմ հոգիս խռովված է » (Հվհ 12, 27)։ Ինչպե՞ս է, այդ իշխանությամբ օժտված լինելով հանդերձ, այս Մարդ-Աստվածը խռովվել։ Դրա պատճառը մեկն է. որովհետև Իր վրա կրում էր մեր տկարության պատկերը։ Երբ ասում է. « Իշխանությունն ունեմ ընծայելու իմ կյանքը և իշխանությունն ունեմ այն ետ վերցնելու », Քրիստոսը բացահայտում է, թե Ո՛վ է Ինքը Ինքն Իր մեջ։ Իսկ երբ մահվան մոտիկության պատճառով խռովվում է, Քրիստոսը բացահայտում է, թե ո՛վ ես դու քո մեջ։ [...]

Սբ. Օգոստինոս Հիպպոնացու (354-430) « Ճառեր »ից, 305, 4 (Սուրբ Լավրենտիոսի տոնի առթիվ).
Աղբյուր՝ Mashtoz.org