Այսպէս է ասում Տէրը. Որդեա՛կ, պահի՛ր իմ խօսքերը եւ օր ու գիշեր դրանց մասի՛ն մտածիր իբրեւ հարազատ որդի եւ ազնիւ ժառանգ, իսկ նա, ով չի նորոգում եւ բարձրացնում նախնիների առաքինութիւնը, նա ամօթ եւ նախատինք է իր պապերի համար եւ մի նոր անէծք: ՍԻՐԱՔ ; 20 ,28

Անտուան դը Սենտ-Էքզյուպերի․ Աղոթք

Տեր իմ, ես քեզնից հրաշքներ ու միրաժներ չեմ խնդրում, այլ ամեն օրն ապրելու ուժ: Սովորեցրու ինձ քիչ-քիչ քայլերի արվեստը: Դարձրու ինձ դիտունակ ու հնարամիտ, որպեսզի ես խայտաբղետ առօրյայում կարողանամ ժամանակին կանգ առնել հայտնագործությունների ու փորձի վրա, որը հուզում է ինձ: Սովորեցրու ինձ ճիշտ տնօրինել իմ կյանքի ժամանակը: Ինձ ընծայիր զգացողության նրբություն, որպեսզի տարբերեմ գլխավորն ու երկրորդականը: Ինքնազսպումի ու չափի ընկալման ուժ տուր ինձ, որպեսզի ես կյանքում չճախրեմ ու չսահեմ, այլ խելամիտ ծրագրեմ օրվա ընթացքը, կարողանամ տեսնել գագաթներն ու հեռուները և գոնե երբեմն ժամանակ գտնեմ արվեստով սքանչանալու: Օգնիր հասկանալ, որ երազները չեն կարող օգնություն լինել: Ոչ անցյալի, ոչ ապագայի երազները: Օգնիր ինձ լինել այստեղ ու հիմա և այս պահն ապրել իբրև ամենակարևորը: Պահպանիր ինձ միամիտ հավատից, որ կյանքում ամեն ինչ հարթ է լինելու: Ընծայիր ինձ հստակ գիտակցություն, որ դժվարությունները, պարտությունները, անկումներն ու ձախորդությունները ընդամենը կյանքի բնական բաղկացուցիչներն են, որոնց շնորհիվ մենք հասունանում ենք ու իմաստնանում: Հիշեցրու ինձ, որ սիրտը հաճախ է վիճում բանականության հետ: Անհրաժեշտ պահին թող կողքիս լինի մեկը, ով քաջություն ունի ճշմարտությունն ասելու, բայց` սիրելով ասելու: Ես գիտեմ, որ շատ խնդիրներ լուծվում են, երբ ոչինչ չես ձեռնարկում, ուրեմն սովորեցրու ինձ համբերել: Դու գիտես` ինչքան շատ ենք մենք զգում ընկերոջ կարիքը: Ինձ արժանի դարձրու Ճակատագրի այդ ամենասքանչելի ու քնքուշ պարգևին: Տուր ինձ հարուստ երևակայություն, որ անհրաժեշտ պահին, անհրաժեշտ տեղում, լռությամբ կամ խոսքով ինչ-որ մեկին անհրաժեշտ ջերմությունն ընծայեմ: Դարձրու ինձ այնպիսին, որ կարողանում է հասկանալի լինել բոլորին: Պահպանիր ինձ կյանքում վրիպելու վախից: Տուր ինձ ոչ այն, որ ինքս եմ ինձ համար խնդրում, այլ այն, ինչն ինձ իսկապես անհրաժեշտ է: