Այսպէս է ասում Տէրը. «Կամենում եմ, որ դուք ամէնքդ էլ լեզուներ խօսէք. աւելին՝ որ մարգարէանաք. որովհետեւ նա, ով մարգարէանում է, աւելի լաւ է, քան նա, ով լեզուներ է խօսում. միայն թէ նա թող բացատրի, որպէսզի եկեղեցին ամրանայ» (Կորնթացիներ 14:5)

Աստվածն Ինքն ամբողջությամբ Սեր է

Ընդունվելով վանք, ապագա սուրբը՝ Հայր Սիլուանը, դեռևս շատ միամիտ էր և անփորձ:

Շատ էր աղոթում, սակայն տարբեր մտքեր անհանգստացնում էին նրան. «Ահա դու աղոթում ես և հնարավոր է փրկվես: Իսկ եթե դրախտում չհանդիպես ծնողներիդ, քույրերիդ և եղբայրների՞դ... ուրախություն չես ճաշակի»:

Նույնիսկ մեկ անգամ վանականի խուցը լցվեց շատ վառ լույսով: Լույսը համատարած էր: Վանականը լսեց. «Ընդունի'ր, ս'ա է երանությունը»: Սակայն երջանկության փոխարեն նա շփոթմունքի մեջ ընկավ և չգիտեր, թե ինչ մտածեր: Դրանից հետո չէր կարողանում աղոթել, նույնիսկ մեկ անգամ ծիծաղեց աղոթքի ընթացքում, չնայած հետո շատ ուժեղ զարկեց ինքն իր ճակատին, որ սթափվի: Հասկացավ, որ տեսիլքը Աստծուց չէ...

Սկսեց տեսնել դևերին և միամտորեն խոսել նրանց հետ: Ոմանք ասում էին. «Դու փրկվա'ծ ես», մյուսները՝ «Երբևիցե չե'ս փրկվի»: Երբ երիտասարդ վանականը հարցրեց, թե ինչու են նրանք հակառակ բաներ խոսում, նրան ծաղրեցին: «Մենք երբևէ ճշմարտություն չենք ասում», - պատասխանեցին դևերը:

Վանականը շատ էր տանջվում այն ամենից, ինչ կատարվում էր իր հետ: Ուժերը լքում էին նրան և մի օր խցում նստած, հուսահատության մեջ մտածեց, որ հնարավոր չէ Աստծո գութը շարժել... Ամբողջովին իրեն լքված զգաց... Մեկ ժամից ավելի գտնվելով շատ ծանր թախծության մեջ, նա այնուամենայնիվ գնաց ժամերգության: Այնտեղ, ինչպես պատմում էր սուրբը, նա տեսավ Կենդանի Աստծուն. նրան երևաց Քրիստոսը...

Այդ ակնթարթը փոխեց նրա ամբողջ կյանքը և ճգնավորը այսուհետև տենչում էր միայն Աստծուն:

Հետագայում նա ասում էր. «Աստված մեզ նման չէ: Նա շատ հեզ է, ողորմած ու բարի, և երբ հոգին ճանաչում է նրան, ապա անվերջ զարմանում է և ասում. «Ա'հ, ինչպիս՜ի Աստված ունեմ ես...»: Մեղավոր հոգին, որը չգիտի Աստծուն, վախենում է մահից, մտածում է, որ Աստված չի ներելու իր մեղքերը: Բայց դա նրանից է, որ հոգին չգիտի Աստծուն, և այն, թե ինչքա՜ն շատ է Աստված մեզ սիրում: Իսկ եթե իմանայինք, ապա ոչ մի մարդ երբևէ չէր վհատվի... Աստվածն ինքն ամբողջությամբ Սեր է...»:

Թարգմանությունը կատարվել է «Սուրբ Սիլուան Աթոսացի. վեց պատմություն կյանքից, յոթ իմաստալից խոսք» հոդվածից:

Աղբյուր՝ Holytrinity.am