Այսպէս է ասում Տէրը. «Վշտակի՛ց եղիր Քրիստոս Յիսուսի տառապանքներին որպէս նրա բարի զինուորը։ Ոչ ոք, զինուոր դառնալով, չի զբաղուի աշխարհիկ կեանքի գործերով, որպէսզի զօրավարին հաճելի լինի։ Եւ եթէ մէկը մրցամարտիկ է, պսակ չի ստանայ, եթէ ըստ օրէնքի չմարտնչի» (Տիմոթեոս 2:3-5)

Ստեփան Ռոստոմյան. Կենսագրութուն

Ստեփան Արզումանի Ռոստոմյան (ապրիլի 4, 1956, Կիրովական, Հայկական ԽՍՀ, ԽՍՀՄ), կոմպոզիտոր, ՀՀ արվեստի վաստակավոր գործիչ (2009): Ռոստոմյանը հետխորհրդային շրջանի այն կոմպոզիտորներից է, ում գործեր են պատվիրել այնպիսի մենակատարներ և անսամբլներ, ինչպիսիք են Օլեգ Կոգանը, Յուրի Բաշմետը, Լոնդոն Սիմֆոնիետանը։ Շոտլանդական արվեստի խորհուրդը չորս անգամ ֆինանսավորել է Ռոստոմյանի պատվերները և յուրաքանչյուր պրեմերիա կամ կատարում որակել է որպես սենսացիոն հաջողություն։ Նրա ստեղծագործություններից շատերը, ըստ ամերիկյան Leonardo ամսագրի հայտնի են դարձել Արևմուտքում։ Նրա ստեղծագործություններից «Հրեշտակի տաղ», տաղերի եռյակ (հայկական միջնադարյան հոգևոր երաժշտության ձև) բազմիցս կատարվել է Շվեյցարիայում, Մեծ Բրիտանիայում, Ամերիկայում և արժանացել բարձր գնահատանքի։ Ռոստոմյանը գրել է երաժշտություն բազմաթիվ ներկայացումների և ֆիլմերի համար։ Նա հանդիսանում է հայկական երաժշտության և մշակույթի դեսպան՝ ներկայացնելով այն տարբեր դասախոսությունների, կոնֆերանսների արտերկրում։ 1989 թվականին հրավիրվել է աշխատելու Գլազգոյի համալսարանի էլկտրո ակուստիկ ստուդիայում։ Հետագայում այդ փորձը բերել է Հայաստան, բացել է էլէկտրոնիկ երաժշտության բաժին Երևանի Կոմիտասի անվան պետական կոնսերվատորիայում։ Ռոստոմյանը լավագույն 500 առաջատար կոմպոզիտորներից է, ում աշխատանքները ներառված են «Ժամանակակից կոմպոզիտորներ» տեղեկատուում:

Կենսագրություն

Ստեփան Ռոստոմյանը ծնվել է Կիրովականում։ Ավարտել է Երևանի Ռոմանոս Մելիքյանի անվան երաժշտական ուսումնարանի ջութակի դասարանը, 1980 թվականին՝ Երևանի Կոմիտասի անվան պետական կոնսերվատորիայի կոմպոզիցիայի ֆակուլտետը (Ղազարոս Սարյանի և Ավետ Տերտերյանի դասարան)։ 1980-1984 թվականներին աշխատել է Հայաստանի պետական ակադեմիական կապելլայում՝ որպես երաժշտական խորհրդատու։ 1989 թվականից դասավանդում է Երևանի կոնսերվատորիայում, 1998 թվականից՝ դոցենտ, 2000 թվականից՝ պրոֆեսոր: 1989-1990 թվականներին աշխատել է Գլազգոյի «Շոտլանդիա» համալսարանում, 1990-1992 թվականներին՝ Երևանի Սունդուկյանի անվան ազգային ակադեմիական թատրոնի երաժշտական ղեկավար։ 1994-2002 թվականներին եղել է «Գանձասար» հոգևոր կենտրոնի շարականագիտական բաժնի ղեկավարը և երաժշտական խմբագիրը, 1997 թվականից հայ ժամանակակից երաժշտության կենտրոնի տնօրենն է, 1999 թվականից՝ հայ երաժշտության ինֆորմացիոն կենտրոնի նախագահ, 2000 թվականից՝ «Երևանյան հեռանկարներ» միջազգային երաժշտական փառատոնի հիմնադիր տնօրեն, գեղարվեստական ղեկավար, 2000-2002 թվականներին` «Վեմ» դասական ռադիոկայանի տնօրեն։ 2001-2002 թվականներին «Քրիստոնյա Հայաստան» և «Համաքրիստոնեական մշակույթ» միջազգային դասական և հոգևոր երաժշտության փառատոների գեղարվեստական ղեկավար։ 1999 թվականից ԱՄՆ կոմպոզիտորների միության, 2003 թվականից՝ Մանկավարժական գիտությունների միջազգային ակադեմիայի անդամ է:

Ստեղծագործություններ

«Տաղ սուրբ երրորդության», 2012, ֆլեյտայի, հոբոյի, ջութակի, թավջութակի, սոպրանոյի, դաշնամուրի, հարվածային գործիքների համար։ Պատվիրված է «Դիլիջան» համերգաշարի կողմից, ԼԱ, Ամերիկա։

«Տաղ ավետման», 2008, ֆլեյտայի, հոբոյի, ջութակի, թավջութակի, սոպրանոյի, դաշնամուրի, հարվածային գործիքների համար։ Պատվիրված է Cove Park արվեստի միության կողմից, Մեծ Բրիտանիա։

«Մուտք» օպերա, 2002, գրված նվագախմբի, ժողովրդական գործիքների (դուդուկ, զուռնա, պկու), շոտլանդական պարկապզուկի, ավստրալիական դիջիրիդուի համար։ Պատվիրված է Լոնդոն Սիմֆոնետայի կողմից և առաջին անգամ կատարվել է նրանց կողմից Երևանում 2002 թվականին։

«Տաղ հրեշտակային», 2001, ֆլեյտայի, հոբոյի, ջութակի, թավջութակի, դաշնամուրի և սոպրանոյի համար։ Պատվիրվել և առաջին անգամ կատարել է «Մենակատարների անսամբլ»-ը, Ցյուրիխ, Շվեյցարիա։ (20, սեպտեմբեր 2001)

2000-ին գրել է երաժշտություն «Խոր վիրապ» թատերական ներկայացման և համանուն ֆիլմի համար (ռեժիսոր Խորեն Աբրահամյան)` պատվիրված Հայաստանի կառավարության և Եկեղեցու կողմից` Հայաստանում Քրիստոնեությունը պետական կրոն հռչակելու 1700-ամյա տարելիցի կապակցությամբ։

Սիմֆոնիա թիվ 4, 1998, պատվիրված «Պարագոն» անսամբլի և շոտլանդական արվեստի խորհրդի կողմից։ Այս սիմֆոնիան ունի կատարման երկու տարբերակ։ Առաջին տարբերակը նախատեսված է մեծ նվագախմբի և ֆոնոգրամների համար (երգչախմբեր, եկեղեցական զանգեր, հայկական ազգային գործիք՝ դուդուկ)։ Երկրորդ տարբերակը նախատեսված է 15 մենակատարների և ֆոնոգրամների համար։ Երկրորդ տարբերակի համաշխարհային պրեմերիան տեղի է ունեցել Գլազգոյի երաժշտության և դրամայի թագավորական շոտլանադական ակադեմիայում, կատարվել է «Պարագոն» անսամբլի կողմից (դիրիժոր՝ Դեվիդ Դևիս)։ Հետագայում ունեցել է բազմաթիվ կատարումներ։

1989-1996 Ռոստոմյանը գրել է երաժշտություն մի քանի ֆիլմերի և թատերական ներկայացումների համար։ Նրա երաժշտությունը օգտագործվել է Արա Վահունու և Զոհրապ Պապոյանի ֆիլմերում։

Փողային կվինտետ թիվ 2, 1989 պատվիրված «Պարագոն» անսամբլի և «Նյու բեգիննինգս» փառատոնի կողմից։ Համաշխարհային պրեմերիան կայացել է «Նյու բեգիննինգս» փառատոնում, Գլազգո, նոյեմբեր, 1989: Կատարվել է ամբողջ աշխարհի հեղինակավոր փառատոներում։

Սիմֆոնիա թիվ 3, 1989, կամերային անսամբլի և ֆոնոգրամների համար՝ պատվիրված «Պարագոն» անսամբլի և «Նյու բեգիննինգս» փառատոնի կողմից։ Պրեմիերան կայացել է «Նյու բեգիննինգս» փառատոնում Գլազգո, նոյեմբեր, 1989: Համարվել է երբևէ պատվիրված ամենահաջող գործերից մեկը և ունեցել անհամար կատարումներ։

Սիմֆոնիա համար 2, "Lux Aeterna", 1986, նախատեսված կամերային նվագախմբի, երգչախմբի, 2 մենակատարների և եկեղեցական զանգերի համար։

«Թանկա», 1983- վոկալ շարք սոպրանոյի և դաշնամուրի համար՝ հին ճապոնական պոեզիայի տեքստով։ Առաջին անգամ կատարվել է Երևանի կոմպոզիտորների միությունում։ Աշխատությունն ահռելի հաջողություն է ունեցել անդրկովկասյան կոմպոզիտորների փառատոնին՝ Թբիլիսի, Վրասատան։

Սիմֆոնիա թիվ 1, 1980- ամբողջական սիմֆոնիկ նվագախմբի համար։ Արժանացել է հանրապետական մրցանակի սիմֆոնիկ երաժշտական մրցույթում։ Պրեմերիան կայացել է 2007 թվականին։ Կատարվել է Հայաստանի պետական ֆիլհարմոնիկ նվագախմբի կողմից, դիրիժոր՝ Փոլ Մըքկալինդին։

Փողային կվինտետ թիվ 1, 1980- առաջին անգամ կատարվել է մենակատարների անսամբլի կողմից Երևանի օպերայի և բալետի ազգային ակադեմիկան թատրոնում։

Էսքիզներ, 1980, սիմֆոնիկ նվագախմբի համար։

«Եռյակ», 1979, ջութակի, կլառնետի, դաշնամուրի համար։

Լարային քառյակ, 1978, առաջին անգամ կատարվել է Երևանի պետական կոնսերվատորիայի լարային քառյակի կողմից։

Պարգևներ

«Հայրենիքին մատուցած ծառայությունների համար» 2-րդ աստիճանի մեդալ, 2016

Երևանի քաղաքապետի ոսկե մեդալ (2014)

ՀՀ արվեստի վաստակավոր գործիչ (2009)

Լեոնարդո դա Վինչի շքանշան (2007) Իտալիա

Ալբերտ Շվայցերի մեդալ (2005) Հանովեր

«Պետրոս 1-ին» մեդալ (2006) Մոսկվա

ՀՀ մշակույթի նախարարության ոսկե մեդալ (2006)

Եվրոպական միջազգային գիտությունների ակադեմիայի ակադեմիկոսի կոչում (2006)

Միջազգային բնական գիտությունների և հասարակության ակադեմիայի /IASNS/ ակադեմիկոսի կոչում (2003)

Տեսանյութը՝ Շողակաթ հեռուստաըներության։