Այսպէս է ասում Տէրը. «Խաբէութեան հացը քաղցր է թւում մարդու, բայց յետոյ նրա բերանը պիտի լցուի խիճով» (Առակներ 20:17)

Տեր Եսայի քհն. Արթենյան. Աստվածային սերը զգացմունք չէ

Կարելի է մարդու հետ զրուցել, իմաստուն խորհուրդներ ու խրատներ տալ, ոգևորել նրան, բայց այդ ոգևորությունը հնարավոր է, որ ոչ մի դրական արդյունք չբերի մարդու կյանքում, որովհետև սովորաբար ոգևորությունը հեշտ ծնվում և հեշտ էլ մարում է:

Նման ոգևորություն ծնվում է եկեղեցական տոների ժամանակ. մենք ուրախանում և ոգևորվում ենք: Սակայն պարզ ոգևորությունը բավարար չէ:

Իսկական քրիստոնյան նա չէ, ով հեշտությամբ ոգևորվում և սկսում է ժամանակավոր զգացմունքներով առաջնորդվել: Իսկական քրիստոնյան նա է, ով գիտակցում է, որ ինքը հոգեպես տկար է և գիտի՝ ում դիմել հոգու բժշկություն և մխիթարություն ստանալու համար: Միայն մեղավորության գիտակցումը մարդուն փրկության չի կարող առաջնորդել: Մարդը պետք է կարողանա իր զղջումը կյանքի կոչել, տեսանելի արդյունքների հասնել: Որքան էլ խոսենք հավատքից, իրականում միայն մեր գործերն են ունակ ապացուցելու մեր հավատքի գոյությունը:

Մարդը մշտապես հենարանի կարիք է զգում. աշխարհի բոլոր կրոնները և ուսմունքները փորձում են մարդուն տալ այդ հենարանը, որի վրա մարդը պիտի կառուցի իր հոգևոր կյանքը: Մեզ համար այդ հենարանը Աստվածային սերն է: Կարևոր է որ մենք անկեղծ լինենք ինքներս մեր և Աստծո հանդեպ: Բոլորս ցանկանում ենք փրկվել, իրական քրիստոնյայի կենցաղ վարել, սիրելի լինել Աստծուն: Սակայն Աստված մեզ սիրում է անկախ ամեն ինչից: Մենք այդ սերը ոչնչով ավելացնել կամ պակասեցնել չենք կարող, սակայն մեր մեջ եղած սերը զորացնելու և այդպիով Աստծուն սիրելի լինելու հնարավորությունը տրված է մեզ:

Մարդը տարբեր կարողություններով է օժտված. ժամանակի ընթացքում դրանք կարող են կորչել կամ սահամափակվել, կարող ենք կորցնել իրենց նշանակությունը, սակայն սիրելու ունակությունը միակ հավիտենական արժեքն է մարդու համար:

Սիրտն ու հոգին մարդու ամենաթանկ պարգևներն են, ամենամեծ ունեցվածքն ու արժեքը: Այդ պատճառով էլ պետք է կարողանալ լցնել, դաստիարակել սեփական սիրտն ու հոգին աստվածային սիրով: Քանի որ աստվածային սերն է պայմանը, որ Քրիստոս վերածնվում է մեր սրտերում՝ պարգևելով մեզ կյանք ու փրկություն:

Աղբյուր՝ Holytrinity.am