Այսպէս է ասում Տէրը. Որդեա՛կ, պահի՛ր իմ խօսքերը եւ օր ու գիշեր դրանց մասի՛ն մտածիր իբրեւ հարազատ որդի եւ ազնիւ ժառանգ, իսկ նա, ով չի նորոգում եւ բարձրացնում նախնիների առաքինութիւնը, նա ամօթ եւ նախատինք է իր պապերի համար եւ մի նոր անէծք: ՍԻՐԱՔ ; 20 ,28

Հրաչյա Թամրազյան. Ու ես մեկնում եմ...

Ու ես մեկնում եմ - մեկնելուց առաջ
Ոչ մեկին ոչինչ այդպես էլ չասած,
Ու ես փնտրում եմ խոսքը կենարար,
Որ մեկնեց մի օր ու տեղ չհասավ։
Իմ ապրած կյանքում ոչինչ չտեսած՝
Ես կուրորեն մի այլ կյանք եմ մտնում -
Կյանքի ցնծություն, գոյության սարսափ,
Ու ես տնտղում եմ պտղունց առ պտղունց,
Ու ես չափում եմ վայրկյան առ վայրկյան
Այն՝ ինչ ապրեցի ու պիտի ապրեմ,
Բխումն ամենի, որ կոչում ենք կյանք,
Որի խոյանքն է պահն այս անհամբեր…
Ու ես թողել եմ բառեր ու տողեր,
Որոնք առանց ինձ լուռ կմղկտան,
Ես ձեզ մնայուն երգեր կթողնեմ,
Որ ամուր լինեն որմերն իմ նոր տան…

7.03.2013