Այսպէս է ասում Տէրը. «Արդ, արթո՛ւն կացէք, որովհետեւ չգիտէք, թէ տանտէրը երբ կգայ՝ երեկոյեա՞ն, թէ՞ կէսգիշերին, աքլորականչի՞ն, թէ՞ առաւօտեան դէմ: Գուցէ, յանկարծակի գալով, ձեզ քնի մէջ գտնի: Բայց ինչ որ ձեզ եմ ասում, ամէնքին եմ ասում. արթո՛ւն կացէք» (Մարկոսի 13:35-37)

Սուրբ Մարիամ Աստվածածնի ծննդյան տոնի քարոզ

«Մայր և կոյս, աղախին Քրիստոսի,

որ բարեխոսդ ես միշտ աշխարհի» (շարական):

​Սիրելի՛ հավատավոր հայորդիներ.

​Այսօր Հայ Առաքելական Սուրբ Եկեղեցին տոնում է Սուրբ Մարիամ Աստվածածնի ծնունդը:

​Որքա՜ն ենք ուրախանում մեր և մեր հարազատների, մեր զավակների ու ծնողների ծննդյան տարեդարձերին: Ուրախանում ենք նրանցով, մեր կյանքում նրանց ներկայությամբ, որ Աստված նրանց պարգևել է մեզ: Ուստի որքա՜ն առավել մեծ ցնծության և ուրախության առիթ է, որքա՜ն օրհնություն է մեզ բոլորիս համար Աստվածամոր ծնունդը, որը ծնունդ տվեց համայն մարդկության Փրկչին: Նրա ծնունդն օրհնյալ է նաև, քանի որ նա բոլոր մարդկանց մեծագույն բարեխոսն է իր Որդու մոտ:

Նա անուշահոտություն է բուրում, որը յուրաքանչյուր քրիստոնյայի առաջնորդում է դեպի առաքինություններ: Նրա սիրտը ցավում է յուրաքանչյուրի անկման և մեղքերի համար: Նա ունկնդիր է յուրաքանչյուրի խնդրանքներին: Իր էությամբ նա մարդուն դրդում է միմիայն դեպի բարին, բարիք գործելուն, դրդում է մեղքերից ազատվելուն և մաքրվելուն: Ահա թե ինչպիսին է նա՝ մարդկության Աստվածածինը՝ քրիստոնեական օրինակելի կերպար: Նայելով նրան՝ քրիստոնյան պետք է անխոնջ կերպով պայքարի մեղքի դեմ և ձգտի բարություն անել: Մարդը կարող է հոգնել ճանապարհին, բայց Սուրբ Կույսի կերպարը մշտապես ոգեշնչող է, քաջալերող և գոտեպնդող:

Շատ կարևոր է քրիստոնյայի համար Մարիամ Աստվածածնի հայացքի առաջ ապրել իր կյանքը, անցկացնել կյանքի օրերը: Ինչո՞ւ, որովհետև մոր աչքի առաջ երեխան ապահով է: Մայրը ուշադիր է երեխայի ընկնելուց, ընկնելու դեպքում թույլ չի տալիս, որ երեխան շատ լաց լինի, օգնում է, բարձրացնում նրան, հանգստացնում է, սրբում նրա արցունքները: Այդպես էլ Տիրամոր հայացքն է մեզ համար: Բարեխոսության աղոթքով նրան դիմելիս կարող ենք վստահ լինել, որ նա թույլ չի տա սխալվել, սխալվելու և մեղանչելու դեպքում էլ կօգնի ոտքի կանգնել, ընկած չմնալ, չընթանալ անհայտ ու մոլոր ճամփաներով, ուժ ու զորություն ստանալ Երկնային Տիրոջից՝ կյանքի ընթացքը ճիշտ շարունակելու համար: Ամեն մայր իր զավակի համար լավագույնն է ուզում, այդպես էլ Սուրբ Կույսը մեզանից յուրաքանչյուրի համար լավագույնն է ուզում: Ցանկանում է, որ մենք առաքինի լինենք: Մոր աչքը իր զավակի հանդեպ շատ ուշադիր է, կանխատեսում է վտանգը և զգուշացնում: Ուժ է տալիս իր զավակներին և խորհուրդներ: Տխրության պահին մխիթարում է և գոտեպնդում:

Մարդը կյանքի տարբեր իրավիճակներում հենարան է փնտրում և հենվում ծնողների աջակցության կամ ունեցվածքի վրա, բարեկամների կամ ծանոթների վրա, սեփական իմաստության վրա, բայց ամենահիմնավոր հենասյունը մարդու համար միմիայն Աստված է, և դեպի այդ հենարանը տանողը Աստվածածնի բարեխոսությունն է մեզ համար: Ու սա կասկածից վեր է, որովհետև ամեն մի քրիստոնյա իր կյանքում զգացել և տեսել է, թե ինչ պատվար ու հենարան է Սուրբ Կույսին դիմելը, իր աղոթքի պատասխանը ստանալը:

Աստվածամոր բարեխոսությունը Աստծո առաջ արդեն իսկ հոգատարություն ու խնամք է մեզանից յուրաքանչյուրի համար, որովհետև նա մեզ համար միշտ բարին է կամենում: Սուրբ Մարիամը քաջության, համբերատարության, հեզության և խոնարհության մարմնացում է և մեզ նույնպես սովորեցնում է լինել քաջ, համբերատար, հեզ ու խոնարհ, չընկճվել ու չվհատվել, չհուսահատվել և չհիասթափվել, այլ հարատևել քրիստոնեական պատվիրանների կատարման մեջ, անմնացորդ կերպով հավատալ և վստահել Աստծուն: Երբեք Ավետարանում չերևաց նրա վհատությունը: Նա աննկարագրելի ուրախության մեծագույն աղբյուր է: Նրան դիմելիս ցրվում են մարդու խավար մտքերը, տխրությունը տեղի է տալիս, լույսի շող է բացվում, հույսն է լուսավորում մարդու միտքը, անդորր է իջնում մարդու սրտին և խաղաղություն է տիրում նրա հոգում:

​Աստվածածինը, որպես Անկեզ մորենի, Աստծու Որդուն իր մեջ ունենալով, չայրվեց ու չմոխրացավ: Մենք էլ պետք է մեր մեջ Աստծուն ունենանք՝ մարմնավորելով Աստծո սերն ու խոսքը: Ուստի, սիրելինե՛ր, Նրա նման ձգտենք կատարել մեր կյանքի թեկուզ փոքրիկ առաքելությունը, ձգտենք հեզ ու խոնարհ լինել, լույս դառնալ ուրիշների համար, այլոց մոտ մարդկանց մասին բարին խոսենք և ոչ թե չարախոսենք, աղոթենք նրանց համար, ովքեր խնդրել են մեզ կամ մեր աղոթքի կարիքն ունեն: Յուրաքանչյուր քրիստոնյա, մեղքերից հեռու մնալով և բարիք գործելով, օրհնության է արժանացնում իրեն, իր ծնողներին և իր զավակներին: Այնպես ապրենք, որ օրհնության արժանանանք և արժանացնենք մեր հարազատներին:

Շնորհավորում եմ բոլոր Մարիամներին իրենց անվանակոչության տոնի առթիվ: Արժանի լինե՛ք ձեր անվանը: Սուրբ Մարիամ Աստվածածինը թող մշտապես բարեխոս լինի ոչ միայն ձեր, այլև բոլորիս համար:

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

Տեր Վահան քհն. Առաքելյան

Աղբյուր՝ Surbzoravor.am