Արարչության վեցերորդ օրվա,վեցերորդ դարի և Քրիստոսի խաչելության համար

Ուրբաթ

Բնությամբ Բարին չհանդուրժեց

Անճառելի բարին միայն Իրեն պահել,

Այլ Իր պատկերով մարդ ստեղծեց

Վեցերորդ առավոտը,

Եվ երրորդ ժամին կողածնին

Օգնական տվեց  հողածնին,

Որոնց դրախտում վայելելու դրեց,

Բայց մահվան պտուղն [ուտել] արգելեց:

Պապանձվեց Դատողի մոտ

Հին Ադամը հանցանքից հետո,

Խաբման պատճառ դրեց կնոջը,

Իսկ կինը՝ օձին դավաճան,

Որով երկիրն այս անիծվեց,

Փուշ և տատասկ սրանում բուսեց,

Մահվան վճիռը մարդուն տրվեց՝

Դառնալ հողին, ինչից ստեղծվեց:

Ջնջել շտապեց Հայրը Փառքի

Պարտքերի գիրը մեր հանցանքների,

Որով հագավ Գթած Որդին

Վեցերորդ դարում մարմինը մեղքերի,

Ուրբաթ օրը Հոր հաճությամբ

Խաչի մահվան եկավ հոժարակամ,

Գառը մորթվեց հին զատկին

Գառների օրինակի փոխարեն

Արդարության ճանապարհին

Լույսի պատվիրանի ուղիով,

Երբ բարձրացար Խաչի վրա,

Մեզ երկինք բարձրացրիր,

Քո անպատում խոնարհությամբ

Եվ կամավոր խաչելությամբ

Հաշտվի՛ր մեզ հետ, Տե՛ր, գթությամբ

Եվ ների՛ր մեղքերը մեր՝ ողորմությամբ:

Սոսկալիդ սերովբեների համար

Եվ Ահեղդ քերովբեների համար,

Խոնարհվեցիր մինչև չարչարանքներ

Մարդկային չարչարելի բնությամբ,

Խաչի վրա մեղքը սպանեցիր

Եվ մահվան դատակնիքը վերացրիր,

Հաշտվի՛ր մեզ հետ, Տե՛ր, գթությամբ

Եվ ների՛ր մեղքերը մեր՝ ողորմությամբ:

Էակների վեհագույն բնությունների

Եվ բոլորի Արարիչդ,

Երբ ծագեցնես խաչիդ նշանը

Քո մյուսանգամ Գալստյանը,

Այժմ հավատով Քեզ երկրպագողներին

Լուսավորի՛ր նրա լույսով,

Որպեսզի խաչակիրների հետ միաձայն

Օրհնենք Քեզ հավիտյան:

ԱՌԱՎՈՏՅԱՆ ԺԱՄԵՐԳՈՒԹՅՈՒՆ