….. Հանդերձյալ կյանքի հույսը վերանալու է , մարդիկ չեն վախենալու Աստուծո դատաստանից , ճշմարիտ հավատքը վերանալու է բոլոր ժողովուրդներից , Աստվածապաշտությունը տկարանալու է , մարդիկ ատելու են Աստուծո պատվիրանները և հակառակվելու Քրիստոսի Սուրբ Ավետարանի խոսքերին : Բոլորը պիտի հանդես գան Աստուծո Սուրբ Պատվիրանների դեմ , պիտի արհամարեն սուրբ վարդապետների խոսքերը , սուրբ հայրապետների կանոնական կարգադրությունները , և այդպիսով շատերը պիտի գլորվեն հավատքի բարձրությունից : Նրանք պիտի ատեն Սուրբ Եկեղեցու դռները , պաս չպահելով և չաղոթելով Աստվածապաշտությունից պիտի հեռանան : Շատերը պիտի անիծյալ լինեն , որովհետև պիտի արհամարհեն հոգևոր սուրբ արռաջնորդների աստվածեղեն խրատական խոսքերը : Որդիները իրենց անհնազանդության պատճառով պիտի անիծվեն ծնողներից , վերջիններս էլ պիտի չարչարվեն աշխարհ բերած իրենց երեխաների կողից : Ցամաքելու է հայրերի և զավակների գթասրտությունը …
Աստուծո անխուսափելի ահավոր դատաստանի վախն ու սարսափը վերանալու է բոլորի մոտից . մարդիկ պիտի մոռանան , որ արդարների և մեղավորների հատուցում կա , նրանք ընթանալով մոլոր ճանապարհով , պիտի մեղքը սիրեն և հեշտասեր դառնան : Նրանք սիրով պիտի գնան հանրատներ : Թագավորները , իշխանները և առաջնորդները ապականելու են երկիրը , առաջնորդներն ու իշխանները պիտի դառնան կաշառասեր , ստախոս , սուտ երդվող և , կաշառք ստանալով , պիտի ոտնահարեն աղքատի իրավունքը : Այսպիսով Աստված է՛լ ավելի պիտի զայրանա նրանց դեմ ՝ տրված իշխանությունը ոչ ըստ Աստուծո կամքի , այլ կողմնակալությամբ վարելու համար :
Իշխաններն ու դատավորները ավելի պոռնկասեր , քան թե Աստվածասեր են լինելու , նրանք պիտի ատեն ամուսնության Սուրբ Խորհուրդը : Վարակվելով պոռնկության ախտով , պիտի սիրեն իրնց նմանների կործանումը : Նրանք մատնիչներին և գողերին պիտի պատվեն , անիրավաբար պիտի հափշտակեն աշխատողի ունեցվածքը և նրանց նկատմամբ անողորմ դատաստան պիտի տեսնեն …. :
Իմ որդիներ , այսուհետև առաջնորդների հակառակության պատճառով պիտի փակվեն սուրբ եկեղեցիների դռները , և բոլոր ժողովուրդների միջից վերանան սուրբ հաստատությունները:
Որդինե՛ր վիրավորելու են անբիծ առաքինի մարդկանց :
Աստվածապաշտությունից շատերը պիտի հեռանան :
Աշխարհիկ առաջնորդները պիտի հղփանան արծաթասիրությամբ : Նրանք բոլոր մերժվածներին Ատուծո ժողովրդի ղեկավար և առաջնորդ պիտի նշանակեն : Նրանք իրենց արածը չպիտի իմանան , քանզի անչափ դրամասիրությունը կուրացնելու է նրանց : Ավելացնում եմ և հետևյալը , սրանից հետո է, որ Քրիստոսն անարժան առաջնորդներից խոր վերք է ստանալու , ավելի խոր , քան ստացել էր հրեաներից ՝ Իր չարչարվելու և խաչվելու ժամանակ, նրանց պակասը սրանք են լրացնելու : Եվ պիտի լսվի . « Բարեկամ , դու ինինչո՞ւ մտար այս հարսանիքը» : Եվ նրա ձեռքն ու ոտքը կապած պիտի շպրտեն խավարն արտաքին (Մատթ. Ը 12 , ԻԲ 13 ) : Եվ հավաքածը իր գլխին է թափելու և կործանելու նրան : Իմ որդիներ , այս բոլորը կատարվելու է հետին ժամանակներում , քանզի արձակվեց սատանան իր հազարամյա կապանքներից , որին կապել էր Քրիստոս Իր Սուրբ Խաչով ….. :
( Շարունակելի )
Աղբյուր ՝ Մատթեոս Ուռհայեցի « Ժամանակագրություն »
Երևանի Համալսարանի Հրատարակչություն – 1991 թ.
